ការទន្ទឹងរង់ចាំថ្ងៃចាប់កំណើតកូនដំបូងរបស់អ្នក គឺជាពេលវេលាដ៏រីករាយមួយ ដែលមិនអាចបំភ្លេចបាន។ មុនដំណាក់កាលសម្រាលបុត្រ មានការពិនិត្យសុខភាពជាប្រចាំ សម្រាប់ទាំងម្តាយ និងទារក (ដូចជាការឆ្លុះអេកូ និងតេស្តឈាមជាដើម)។
ដូច្នេះតើលោកអ្នកនឹងរៀបចំកញ្ចប់ថវិកាបែបណា? ថ្លៃចំណាយ សម្រាប់ពិនិត្យសុខភាព មានតម្លៃខុសគ្នា ទៅតាមគ្លីនិកនីមួយៗ ដែលចន្លោះពី ២០ដុល្លារ ទៅ ៥០ដុល្លារ ឬក៏អាចច្រើនជាងនេះ សម្រាប់ការពិនិត្យម្តង។ សម្រាប់ជម្រើសធូរថ្លៃជាងនេះ លោកអ្នកអាចទទួលសេវាកម្ម នៅតាមមន្ទីរពេទ្យរដ្ឋផងដែរ។ម្យ៉ាងវិញទៀត ប្រសិនបើលោកអ្នកគឺជាបុគ្គលិក ផ្នែកវិស័យឯកជន ហើយមានប័ណ្ណសមាជិករបបសន្តិសុខសង្គម (ប.ស.ស) លោកអ្នកអាចទទួលសេវាពិនិត្យសុខភាព ដោយយឥតគិតថ្លៃ នៅទតាមន្ទីរពទ្យរដ្ឋ និងគ្លីនិកឯកជននានា ដែលជាសមាជិករបស់ប. ស. ស។
ទម្រាំលោកអ្នកបានដឹង ទារកក៏បានចាប់កំណើតរួចហើយ! ក្រុមហ៊ុនមួយចំនួនរ៉ាប់រង លើការចំណាយមាតុភាព ប៉ុន្តែលោកអ្នកគួរតែបម្រុងទុកថវិកាមួយចំនួន សម្រាប់ថ្លៃចំណាយវេជ្ជសាស្រ្ត ឬការប្រឈម ពេលសម្រាលបុត្រជាដើម។ តាមការប៉ានស្មាន កញ្ចប់សម្រាលបុត្រ នៅតាមមន្ទីរពេទ្យឯកជន មានតម្លៃជាមធ្យមប្រហែល ៥០០ដុល្លារ។ ដូច្នេះការពិនិត្យមើលកញ្ចប់សេវាធានារ៉ាប់រងរបស់អ្នក គឺពិតជាមានសារៈសំខាន់ ហើយផ្ទៀងផ្ទាត់នឹងតម្លៃសម្រាលបុត្រ នៃមន្ទីរពេទ្យ ដែលលោកអ្នកបានជ្រើសរើស។
ជាការណ៍ល្អ ប័ណ្ណ ប.ស.ស ដែលផ្តល់នូវសេវាកម្មសន្តិសុខសង្គម ក៏គ្របដណ្តប់លើការទទួលសេវាកម្មសម្រាលបុត្រ នៅតាមមន្ទីរពេទ្យរដ្ឋ ជាមួយនឹងកញ្ចប់ថវិកា ដែលបានកំណត់។ ជាងនេះទៅទៀត ទោះជាលោកអ្នកសម្រាលបុត្រ នៅគ្លីនិកឯកជន ឬមន្ទីរពេទ្យរដ្ឋក៏ដោយ លោកអ្នកនឹងទទួលបានថវិកា ១០០ដុល្លារ រួមទាំងប្រាក់ឧបត្ថម្ភ ៧០% នៃប្រាក់ខែរបស់អ្នក សម្រាប់រយៈពេល ៣ខែផងដែរ។
